Të hënën në mbrëmje Top Channel do të transmetojë një intervistë që drejtori i informacionit Sokol Balla ka zhvilluar me Presidentin e Turqisë Rexhep Taip Erdogan.
Në këtë intervistë, qartazi Erdogan ka shprehur mbështetjen e tij për kryeministrin Edi Rama ndërsa është shprehur se: “Dua t’i uroj fat mikut tim të dashur, kryeministrit Edi në përpjekjet e tij. Po ashtu edhe presidentit të zgjedhur. Personalisht jam për një solidaritet mes tyre. Zgjedhjet në Shqipëri do të shënojnë fillimin e një epoke të re dhe unë besoj se shqiptarët do të fuqizojnë të ardhmen e tyre”.
Kjo deklaratë e paprecedentë e Presidentit të Turqisë është padiskutim një ndërhyrje e hapur në punët e brendshme dhe në zgjedhjet në Shqipëri, ndërhyrje e cila duket se është sponsorizuar me kërkesën e Kryetarit të PS-së, Edi Rama. Është e panatyrshme të bësh një krahasim mes shfaqjes së Rexhep Taip Erdogan në fushatën e vitit 2009 në krah të ish kryeministrit Berisha gjatë inaugurimit të Tunelit Rrëshen Kalimash pjesë e Rrugës së Kombit dhe intervistës së paprecedentë që po i njëjti persona, 100 herë më autoritar se 8 vjet më parë në shtetin e tij ka dhënë për televizionin qartazi në shërbim të Edi Ramës.
Prania e Erdogan 8 vjet më parë në krah të ish kryeministrit Berisha, më shumë se mbështetje për Partinë Demokratike, ishte qartazi një mbështetje për konsorciumin turk Bechtel-Enka, kompani e cila ndërtoi Rrugën e Kombit dhe gjatë fjalimit të tij në Thirrë, asokohe Erdogan nuk foli për asgjë më shumë sesa fakti që rruga bashkonte Shqipërinë me Kosovën dhe të dy këto vende me Turqinë, interesa për të cilat Presidenti i Turqisë i sheh qartazi të lidhura me interesin ekonomik të vendit që drejton dhe kurrgjë më shumë. Rasti i intervistës së Erdogan për Top Channel dhe mbështetja e hapur për Kryeministrin aktual, është diçka që i tejkalon raportet e miqësisë mes Shqipërisë dhe Turqisë, dhe ato mes popullit turk dhe shqiptarëve.
Intervista ndërhyrëse e Erdogan për zgjedhjet në Shqipëri, duket se është një kudërpërgjigje e Edi Ramës për mbështetjen që Donald Trump i dha Lulzim Bashës pak ditë më parë në Miluoki, ku edhe njëherë loja e gatuar nga kryesocialisti në tentativën për të marrë i vetëm timonin, është më shumë se e pisët.
Ndërhyrja e Rexhep Taip Erdogan 1 javë përpara se shqiptarët të vendosin se kush do ti qeverisë ata për katër vitet e ardhëshme është qartazi një incident i pakëndshëm në raportet diplomatike mes Shqipërisë dhe Turqisë me arkitet Edi Ramën dhe interesat e tij, duke shfrytëzuar si fasadë Rexhep Taip Erdogan dhe interesat e tij. Një vit më parë Erdogan u kthye në shoferin personal të Edi Ramës gjatë inaugurimit të tunelit që lidh pjesën europiane të Turqisë me pjesë aziatike të saj, në kuadrin e show-t të miqësisë së madhe. Ndërsa sot Erdogan duket se i ka kthyer borxhin Ramës, duke u shfaqur në kazanit e tij personal mediatik me zë e me figurë, me shpresën se delfini i tij Rilindas do të marrë timonin e vetëm në 26 Qershor.
Pyetja është se çfarë do të mendonte babai i pavarësisë së Shqipërisë nga Turqia, Ismail Qemali për këtë rikthim në politikën e Haxhin Qamilit nën moton “Dum babën”?…
