Nënë Lefko jeton e vetme në Nartë të Vlorës. Është 81 vjeçe, e thinjur, me njëmijë e një halle mbi supe dhe me një pension që nuk shkon më shumë se 10 mijë lekë në muaj. Për ato pak pula që mbante, tentoi të bëjë një kotec me sipërfaqe 3-4 m2 . Brenda ditës, policia e zbuloi “krimin” e rëndë, mbërritën fugonat dhe makinat me sirena e madje edhe vetë nënkryetari i bashkisë për të arrestuar “kriminelen”, që tentoi të ndërtojë në pronën e vet një ndërtesë të vogël siç ka çdo banor i zonës.
Nënë Lefko u kërkoi policëve t’i jepnin kohë të vishej, të krihte flokët e të lante fytyrën përpara se ta merrnin në komisariat, nuk e dëgjuan. E tërhoqën zvarrë si të ishte Griselda Blanco, apo ndonjë antare e Cosa Nostras. E mbajtën për 4 orë në komisariat duke i ushtruar një dhunë të tmerrshme psikologjike, ndonëse ligji e ndalon shoqërimin në polici të personave mbi 70 vjeç. Sot, nënë Lefko është e frikësuar nga ajo që përjetoi dhe po pret seancën gjyqësore për të mësuar fatin e saj. Sipas avokatit, mund të dënohet nga 6 deri në 12 muaj burg, dënim që mund të kthehet edhe në konvertim si shërbim prove.
Nënë Lefko, 81 vjeçe, në burg për një kotec pulash! E imagjinoni sesa e pamëshirshme është qeveria jonë ndaj armikut të klasave dhe vetë partisë?!
Nga ana tjetër kemi Belindën, një grua të re, e mbushur plot me mistere. Çdo mëngjes krihet, pispilloset, vishet firmato nga koka te këmbët. Ha mëngjes, i cili i kushton aq sa nënë Lefko merr pension në muaj. Jashtë derës së parukerisë, ku vetëm modeli i flokëve i bën 20 mijë lekë në ditë, dyfish sa pensioni i nënë Lefkos, e pret një “Audi A8”. Nuk bën asnjë hap në këmbë, naftën ja paguan nënë Lefko dhe të gjitha nënat shqiptare që kanë punuar për të ndërtuar një arkë për buxhetin e shtetit. Këtë buxhet, Belinda e menaxhon më së miri. Aq pension sa merr nënë Lefko në vit, Belindës i kushtoi vetëm një biftek te Nusreti.
Kjo është Belinda! Belinda kontrollon çdo punim infrastrukturor në Shqipëri, është përgjegjëse për çdo ndërtim me dhe pa leje. Falë punës së saj të palodhur, një 81-vjeçare sot është nën hetim për një kotec pulash ndërsa katet pa leje në mes të Tiranës, pallatin pa leje te Liqeni i Thatë, nuk i sheh, nuk di gjë për to, janë mistere. Kryeministri i Belindës pranoi me gojën e tij se janë 4-5 mijë metra kator pa leje ndërtimi në sheshin “Skënderbej”. Nuk i shohin as ato, janë mister. Vetëm koteci i nënë Lefkos ku nuk mban më shumë se 20 pula nuk është mister për Belindën.
Belinda nuk është vetëm, ka Ramën udhëheqës. Ligji në dorën e Ramës, po fut në burg qindra qytetarë që ndërtojnë një kotec, një mur, hapin dy dritare apo riparojnë çatinë e shtëpisë. Ligji në dorën e Ramës po lejon që qendra e Tiranës të mbushet me kulla pa leje, po lejon që oligarkët që u financojnë fushatën të marrin qindra metra katror tokë për të ngritur kulla, pa i hyrë një gjemb në këmbë.
Rama është kryeministër vetëm për Belindën, për nënë Lefkon ai është persekutor. Ligji në dorën e Ramës po u shërben vetëm oligarkëve, jo shqiptarëve!
/Nga Nisma Thurrje/
