Nga Nertil Agalliu
Të gjithë mbetën të shtangur, madje të çuditur sesi Edi Rama dhe Lulzim Basha pas 90 ditëve të këtij të fundit të ngujuar në “Çadrën e lirisë”, arritën të dilnin me nje pazar mes tyre pas 5 orësh në një nga dhomat e kryesisë së Kuvendit.
Edi Rama i fali të gjitha Bashës, ministritë, drejtoritë, të zgjidhte vetëm emrat, madje të propozonte pikërisht ata që Basha i propozoi njerëz të cilët e kanë sulmuar, hapur dhe drejt përdrejtë Edi Ramën.
Edi Rama duket se nuk e ka pasur hallin nëse PS se PD, do i merrte kaq shume ministri, as nëse largoi të tijët për t’ia dhënë PD, nëse Basha do të votonte vettingun apo jo. Por, Edi Rama ka pasur vetëm një merak, atë të asgjesimit me çdo metodë të LSI. Ai i dha gjithçka dhe asgjë Lulzim Bashës.
Marrëveshja e nënshkruar, i shkoi për shtat Lulzim Bashës, pasi ishte sebepi për të dalë nga çadra ku u fut vetë, ishte mundësia për të bërë një listë të tijën, ishte mundësia për tu shfaqur në publik si fitimtar, ishte mundësia për të rilindur republikën duke e zëvëndësuar emrin e partisë demokratike me emrin e ri, njësoj si Edi Rama në vitin 2013.
Duke analizuar fushatën e ditëve të fundit duket se marrëveshja Rama-Basha ka pasur vetëm një objektiv, atë që Edi Rama nuk ka mundur ta heq dot i vetëm që pas ardhjes në krye të Partisë Sociliaste, LSI-në.
Marrëveshja tashmë duket e qartë, të jap gjithçka vetëm të asgjesojmë LSI-në. Duke u nisur nga kjo logjikë, Rama dhe Basha tashmë kanë menduar se nga asgjesimi i LSI, fitojnë të dyja palët, pasi nesër mund të qeverisin të vetëm pa ndarjen e tortës në mes siç kanë bërë nga 2009 deri më sot. Por më shumë se kaq fiton Edi Rama, i cili pas largimit të Blushit i duhet që në këto zgjedhje të ndalojë me cdo kusht një nga dy fraksionet e së majtës dhe më e forta është pikërisht LSI për tu goditur pa mëshirë.
Në këtë pikë Edi Rama ka dal i fituar nga marrëveshja e nënshkruar, e para, u realizua ajo që ai shpesh ka thënë që PD, do hyjë në zgjedhje dhe e dyta arriti me mjeshtëri të përdor për herë të parë kundërshtarin e tij politik kundër mikut dhe armikut të tij, Ilir Meta dhe LSI.
Sot Edi Rama dhe Lulzim Basha janë në unision duke goditur dhe sulmuar Lëvizjen Socialiste për Integrim, si të keqen më të madhe, duke harruar se LSI, ka qenë e të dyve në këto 8 vite.
Nëse shumë kush ka menduar dhe mendon se Lulzim Basha është përdorur dhe përdoret nga dora e padukeshme e Sali Berishës, sot lideri i Partisë Demokratike duket qartë se po përdrohet edhe nga rivali i tij politik, Edi Rama.
Edi Rama në karrieren e tij politike ka qënë një mjeshtër i përdorimit të mikut dhe sëfundi edhe ndaj armikut, sa herë që i është dashur dhe i duhet për të realizuar ambicjen e tij.
Këtë e ka bërë shpesh herë ndaj Ilir Metës sa herë i është dashur mbështetja për të fituar Bashkinë e Tiranës, e bëri në vitin 2013 dhe në vitin 2015, por pa mundur ta eleminojë dot në gjithë këto vite të cilat ka tentuar ta bëjë me të gjitha mënyrat.
Tashmë ai po përdor edhe kartën e fundit, rivalin e tij politik për të “vrarë” vëllanë e vogël që i ka dhënë dorën sa herë ka pasur nevojë gjatë karrierës së tij politike.
Boldnews.al
