Studentët ditën e sotme i dorëzuan kryeministrit Edi Rama në shenjë simbolike certifikatën e rekordit “Guinness” duke protestuar në këtë mënyrë për mospërfshirjen e tyre në asnjë pikë të “Rezistencës Sociale”.
“Rekordi Guinness i akordohet Z. Edi Rama, Kryeministër i Shqipërisë. Shënohet në librin e rekordeve botërore si kryeministri i vetëm në botë i cili nuk ka informacion se në Shqipëri ka studentë. Për pasojë, prej nisjes së pandemisë në vitin 2019, studentët shqiptarë janë të vetmit të pambështetur financiarisht”, thuhet në certifikatën e rekordit “Guinness”.
Paketa e rezistencës sociale, e dyta brenda vitit pas asaj të muajit mars “harroi” sërish studentët si kategori e shoqërisë në nevojë për mbështetje në kohë krizash.
“Në asnjë pikë, rresht ose gërmë të paketës nuk u përmendën studentët. Që prej vitit 2019 kur i gjithë vendi kaloi në izolim për shkak të pandemisë e deri më sot, studentëve shqiptarë jo vetëm që ju kanë munguar ndihmat konkrete por tashmë janë zhdukur dhe nga fjlaori i kësaj qeverie”, u shpreh studenti Gevio Tabaku.
Studenti Tabaku theksoi se “vetëm pak ditë larg nga nisja e vitit akademik dhe në këtë vend studentët do paguajnë qiratë sikur të flejnë në Londër dhe mësimin do e marrin si në vendet e botës së tretë. Jemi i vetmi vend në botë ku koha për të shkuar në universitet është më e gjatë se kohëzgjatja e vetë mësimit”.
Aktivistët e ngjitën certifikatën e rekordit “Guinness” në murin e Kryeministrisë për ta vëzhguar edhe qytetarë të tjerë, ndërsa shprehën një sërë problematikash që hasin sot studentët ndërsa ka rritje të cmimeve të produkteve të shportës dhe të naftës.
