Ministri i Brendshëm, Bledi Çuçi ka reaguar për herë të parë pas sulmit kibernetik që “paralizoi” të gjitha pikat kufitare të Shqipërisë.
Pas më shumë se 24 orë nga sulmi, Çuçi bën me dije se sistemi është rikthyer në normalitet vetëm në 6 pikat e kalimit kufitar, ndërsa thekson se po vijon puna e IT për të normalizuar situatën edhe në zonat e tjera kufitare. Ai shton se partnerët amerikanë po bëjnë çdo përpjekje që Shqipëria të jetë sa më e sigurt në mënyrë që të garantohet paprekshmëria e të dhënave.
“Përgëzime ekipit të IT në Drejtorinë e Përgjithshme të Policisë së Shtetit për punën pa ndërprerje që nga minuta e parë e sulmit kibernetik, për të rivënë në funksionim sistemet tona dhe veçanërisht atë TIMS. Gjithashtu falënderoj partnerët amerikanë që kanë qenë pranë edhe në këtë rast e po bëjnë çdo përpjekje për ta bërë Shqipërinë sa më të sigurt. Prej mesnatës sistemi TIMS është rikthyer në funksion të plotë në Pikën e Kalimit Kufitar Rinas. Po kështu është rivënë në punë edhe në pikat e tjera kufitare të vendit: Hani i Hotit, Kapshticë, Muriqan, Morinë, dhe Kakavijë. Aktualisht ekspertët tanë po vijojnë punën e pandërprerë për rikthimin e sistemit TIMS në Pikat e tjera të Kalimit Kufitar si dhe po marrin masat nevojshme për të mos pasur më ndërprerje. Kërkojmë mirëkuptimin e qytetarëve që janë ndeshur me vonesa. Ne kemi punuar prej momentit të parë kur u detektua sulmi kibernetik, për të garantuar mbi të gjitha paprekshmërinë e të dhënave dhe më pas për rikthimin në normalitet në kohën më të shpejtë të mundshme”, shkruan Çuçi.
Policia Kufitare ka përdorur regjistrat e dorës për të bërë hyrje-daljet duke shkaktuar në këtë mënyrë vonesa dhe radhë të gjata. Kujtojmë se më 9 shtator sistemi TIMS u godit nga një sulm kibernetik pas të cilit autoritetet qeveritare thanë se fshihej Irani. Me efekt të menjëhershëm Shqipëria ka ndërprerë marrëdhëniet diplomatike me Republikën Islamike të Iranit të cilët janë larguar nga vendi ynë.
