Nga Arben Rrozhani
Rita Ora është një shqiptare e mirë e skenës botërore të muzikës që na nderon prej vitesh. Sonte do të këndojë në Tiranë, ku ndodhet prej tre ditësh, në një koncert falas në kuadër të Javës Britanike të Kulturës.
Pushteti nuk kishte si të mos e keqpërdorte praninë e saj për t’i thënë të zezës të bardhë.
Sot ajo ishte shumë e prekur ndërsa përmendte përdhunimin barbar të një 11-vjeçareje në Prishtinë, por u shtir i mallëngjyer kryebashkiaku i Tiranës, i cili, prej 7 vitesh përdhunon bashkinë më të madhe të vendit, në orgjinë e pushtetit me mafien e betonit, që e ka bërë kryeqytetin tonë, më të pajetueshmin në Europë dhe ku mbi çdo kënd lojrash për fëmijë, lulishte dhe hapësirë mes pallateve, ngrihet çdo ditë nga një çiban i ri betoni, që helmon dhe nxin jetët e njerëzve.
Dy ditë më parë bashkia e propagandës ngriti lart në qiell deklarimin e Rita Orës se Tirana ka bërë shumë ndryshime. Po, është e vërtetë, por është më zi, siç e përjeton çdokush në lëkurë, siç e thotë edhe Numbeo, faqja botërore që analizon të dhënat që kanë të bëjnë me koston dhe cilësinë e jetesës në kryeqytetet e botës, e cila e renditi pak ditë më parë kryeqytetin shqiptar në vendin e 232-të në listën me 254 kryeqytete, duke shënuar një rënie me 17 vende nga viti i kaluar sa i përket fuqisë blerëse, ndotjes, kostos së jetesës, sigurisë, kujdesit shëndetësor, kohës së qëndrimit në trafik, klimës si dhe raportit të çmimeve të pasurive të paluajtshme në raport ndaj të ardhurave.
E njëjtë sjellja me një këngëtare tjetër të shquar shqiptare, Dua Lipa. Imazhi i saj dhe i fondacionit “Sunny Hill” për të mobiluar kopshtin dhe çerdhen pranë njësisë 5 në kryeqytet, të drejtuar nga babai i këngëtares, ndërtimi të cilit u financua nga qeveria e Katarit, u keqpërdor për të ilustruar si sukses procesin e dështuar dhe korruptiv të Rindërtimit, që ka lënë mes rrugëve dhe të pashpresë mijëra banorë në Kombinat, te Unaza e Re e te 5 maji.
Për ta vazhduar edhe me të ashtuquajturin koncert të “Sunny Hill”, bisht i koncertit mëmë të organizuar në Prishtinë, ku Tirana, në mënyrë meskine, futi hundët dhe duart për të rrëmbyer pak nga lavdia e evenimentit, që gjoja do t’i sillte Tiranës rreth 50 milionë euro në ditë, por përfundoi te biletat nga 100 euro e sipër për këngëtarë dhe DJ të nivelit mesatar.
Dhe për ta mbyllur me kompionen europiane Luiza Gega, që nderoi shqiptarët me vendin e parë në Kampionatin Europian të Altetikës në Mynih. Kampionja e madhe që parakaloi në sheshin “Skënderbej”, ia puthi duart kryeministri e u llastua me gradën kolonele, ende sot stërvitet bashkë me popullin në pistën e rrënuar të Liqenit Artificial të Tiranës.
Kampionja e madhe, përtej pistës, është edhe anëtare e Këshillit Artistiko-Kulturor të Tiranës, një insitucion ku janë firmosur dhjetra projekte të bashkisë së Tiranës, me vlerë miliarda lekë, ndërsa anëtarët vetëm siglojnë për shuka milionash që i kanë zënë frymën dhe kanë mbytur zërin e protestës ndaj korrupsionit, babëzisë, shpërdorimit flagrant të taksave që paguajnë bizneset dhe konsumatorët. Në thesin e madh buxhetor prej 160 milionë euro që e mbushin taksapaguesit, mbi 2 milionë euro Veliaj i lë mënjanë çdo vit për të ashtuquajturat projekte të kulturën, artin, turizmin, rininë, sportin dhe promovimin e Tiranës-shkurt për blerjen e mbështetjes publike, duke bërë propagandë mediatike, blerë gazetarë, media dhe shoqëri civile, ndërsa Luiza dhe figurat e tjera të artit dhe sportit, keqpërdoren nga pushteti për të kuruar imazhin e një qeverisjeje të korruptuar.
Marrë nga: Tpz.al
