Kryeministri Edi Rama ka reaguar ndaj Ministrisë së Jashtmë bullgare, duke nënvizuar se përgjigja e saj ndaj kreut të qeverisë shqiptare është e pamerituar, sa i përket deklaratës së tij se “Bullgaria bllokoi fillimin e negociatave Shqipëri-BE”.
Në një postim në Twitter, Rama nënvizoi se dikush duhet të ndihmojë miqtë tanë të Ministrisë së Jashtme bullgare me përkthimin e përgjigjes së tij në forumin e “Bled”-it në Slloveni.
“Nëse Ministria e Jashtme e Bullgarisë nuk kishte asgjë më të rëndësishme sot sesa një deklaratë publike për diçka që thashë në një panel të Forumit Strategjik të Bled, nuk mund ta marr si një kompliment të madh për forumin dhe panelin, duke përfshirë edhe veten time! Por seriozisht, kjo është e pamerituar. Ndoshta dikush duhet të ndihmojë miqtë tanë të Ministrisë së Jashtme bullgare me përkthimin e qetë të përgjigjes sime në Bled se si Bullgaria bllokoi hapjen e bisedimeve të anëtarësimit për Shqipërinë dhe Maqedoninë e Veriut kur më në fund të gjithë të tjerët ranë dakord pas 8 vitesh të gjata! Thjesht përsërita të njëjtat gjëra që thashë në qershor”, shkruan Rama në një postim në Twitter.
Më herët, Ministria e Jashtme bullgare reagoi pas deklaratave të kryeministrit Edi Rama të bëra në forumin e “Bled”-it në Slloveni, ku tha se ky vend bllokoi fillimin e negociatave të anëtarësimit të Shqipërisë në BE për 8 vite.
Ministria e Jashtme e Bullgarisë nënvizoi në një deklaratë zyrtare se “i refuzon me vendosmëri sugjerimet e tij si të papranueshme dhe të pahijshme për sjelljen e një kryeministri të një vendi kandidat për anëtarësim në BE”.
Sipas reagimit, Ministria e Jashtme ka shprehur tashmë qëndrimin e saj në lidhje “me retorikën antibullgare të Edi Ramës, e cila është kthyer në një refren të përhershëm të fjalimit të tij politik”.
“Tani ajo është e kombinuar me një fokus anti-evropian dhe një përpjekje për të poshtëruar mekanizmat e procesit evropian”, thuhet në reagimin e ministrisë bullgare.
