Nga Boldnews.al
Ministri i Brendshëm, Bledi Çuçi, njoftoi mëngjesin e së Mërkurës se qeveria ka vendosur shkarkimin nga detyra të Drejtorit të Përgjithshëm të Policisë, Gledis Nano.
Argumenti zyrtar është: “Nuk ka përmbushur objektivat prioritare”.
Në fakt, situata me rendin dhe sigurinë nën drejtimin e Gledis Nanos ka pasur problematika të theksuara, ashtu siç ka qenë edhe për paraardhësit dhe, me shumë mundësi, edhe me pasardhësit e tij.
Krimi i organizuar në Shqipëri është në një simbiozë të fortë me pushtetin politik dhe kjo nuk ka nevojë për asnjë konfirmin zyrtar dhe shkresor.
Rastet e bashkëpunimit krim-qeveri janë faktuar në përditshmërinë e kronikës së zezë shqiptare.
Por, shkarkimi i Gledis Nanos shërben edhe për të ri-rrëzuar mitin se “njerëzit e përzgjedhur nga amerikanët janë të paprekshëm”.
Nano erdhi në krye të Policisë Shqiptare në Tetor 2021, duke zëvendësuar Ardi Veliun, i cili, për ironi të fatit u shkarkua nga posti i zv.ministrit të Energjitikës në të njëjtën ditë me me kryepolicin.
Emërimi i Gledis Nanos u shoqërua me një fushatë të ngjeshur mediatike, ku ai konsiderohej si “njeri i amerikanëve”.
Për këtë, shërbenin vlerësimet që kishte marrë Nano nga ambasada amerikane në Tiranë, pas përfshirjes së tij në aksione ndërkombëtare në luftën kundër terrorizmit.
“Njeriu pro-amerikan” ishte pasaporta më e mirë e Gledis Nanos për të marrë dhe mbajtur pozicionin e Drejtorit të Përgjithshëm të Policisë.
Me këtë etiketën “njeriu i amerikanëve”, pritshmëritë ndaj tij ishin shumë të larta. Prej tij pritej angazhimi maksimal i shkëputjes së lidhjeve të krimit me policinë dhe pushtetin e lartë politike.
E, pas kësaj shkëputjeje, pritej që rezultatet kundër krimit të organizuar të ishin të dukshme dhe të prekshme.
Asgjë nga këto nuk ndodhi. Ndoshta nga mungesa e përvojës së Gledis Nanos për të mbajtur poste të tilla administrativo-politike ose sepse ai nuk kishte mbështetjen e duhur nga qeveria.
Nuk është aspak sekret që raportet e tij me Bledi Çuçin ishin më shumë se të ftohta.
Sinjalet e para publike të marrëdhënieve të acaruara u dhanë në publik pas ngjarjes tragjike të Potamit, ku një komisar policie aksidentoi për vdekjen pushuesen 7-vjeçare, në 2 Gusht të këtij viti.
Bledi Çuçi nuk i ndërpreu aspak pushimet e sapo-nisura, ndërkohë që të gjithë dallgët e revoltës qytetare kundër policisë i përballoi i vetëm Gledis Nano.
Çuçi nuk u bë i gjallë për ditë me radhë dhe zgjodhi të reagojë publikisht vetëm, pasi në media e etiketuan si pronar velierash.
Ndërkohë, situata kriminale, vrasjet e tipit mafioz apo akte të tjera të rënda, shënjuan edhe këtë verë dhe Policia rezultoi e paaftë për parandalimin apo zbulimin e autorëve.
Kjo situatë e rënduar kriminale i erdhi për shtat ministrit të Brendshëm, i cili e shfrytëzoi momentin për të kërkuar largimin e Gledis Nanos.
Në fillim të kësaj jave, media pranë qeverisë shpërndanë lajmin se Nano ka dhënë dorëheqjen. Ky informacion u mohua menjëherë nga kryepolici, i cili deklaroi se nuk ka ndërmend të heqë dorë nga detyra.
Në orët e fundit, media që deklarojnë se kanë burime të besueshme pranë Ambasadës Amerikane në Tiranë, raportonin me bindje se diplomatët e “partnerëve strategjikë” janë vënë në lëvizje për të mbështetur “njeriun e tyre”.
Ndoshta edhe e kanë mbështetur, për aq sa kanë pasur mundësi.
Por, gjithçka varet nga një firmë e kryeministrit. Dhe kryeministri vendosi shkarkimin e Gledis Nanos.
Me apo pa mbështetjen e amerikanëve, Gledis Nano është nga sot i papunë. Ndërsa Edi Rama dhe Bledi Çuçi vijojnë të jenë në kolltuqet e tyre.
