Një 25-vjeçare me iniciale E.T ka rrezikuar të mbytet në ambientet e pishinës së resortit “Chateau Lina Resort” në Linzë mbrëmjen e djeshme. Policia njofton se është shpallur në kërkim 52-vjeçari Ylli Hidri, administratori i pishinës, për veprën penale “Shkelja e rregullave të mbrojtjes në punë”.
52-vjeçari akuzohet se në kundërshtim me rregullat e përcaktuara për sigurinë në këto ambiente, nuk ka caktuar një person përgjegjës për të asistuar në raste të tilla. Po ashtu është vënë nën hetim penal shoqëruesi i vajzës O. M., 32 vjeç, pasi sipas bluve, nuk ka ndërhyrë për ta ndihmuar atë.
Raportohet se asnjëri prej dy të rinjve nuk dinte not.
“Në vijim të informacionit të dhënë mbrëmjen e djeshme, sipas të cilit është marrë njoftim se në ambientet e pishinës së një lokali në Linzë, ishte mbytur një vajzë (shtetasja E. T.), e cila pas ndërhyrjes së Policisë, u kontatua në gjendje të rëndë dhe u transportua në spital, ju bëjmë me dije se: Specialistët për Hetimin e Krimeve në Komisariatin e Policisë Nr. 4 referuan materialet në Prokurori, si dhe shpallën në kërkim shtetasin Y. H., 52 vjeç, administratori i pishinës, për veprën penale ‘Shkelja e rregullave të mbrojtjes në punë’, pasi në kundërshtim me rregullat e përcaktuara për sigurinë në këto ambiente, nuk ka caktuar një person përgjegjës për të asistuar në raste të tilla. Vijon puna për kapjen e 52-vjeçarit. Gjithashtu, u referuan materialet, si dhe nisën hetimet për shtetasin O. M., 32 vjeç, pasi edhe pse ka qënë i shoqëruar me shtetasen E. T., nuk ka ndërhyrë për ta ndihmuar atë”, njofton policia e Tiranës.
Ylli Hidri njihet si mik me kryeministrin Edi Rama. Në një postim në rrjetetet sociale në vitin 2019, Rama shprehej për Hidrin: ” E dua shumë se është punëtor i madh”.
