Biznesmeni Yevgeny Prigozhin, i njohur si “Kuzhinieri i Putinit”, është bërë i etur për gjak, thotë aktiviste e njohur ruse për të drejtat e të burgosurve.
Olga Romanova, udhëheqëse e organizatës joqeveritare “Rusia prapa grilave”, ka thënë se ka parë raporte nga të burgosur të besueshëm në të paktën tri burgje. Ata thonë se biznesmeni i lidhur me Kremlinin, Yevgeny Prigozhin, i kishte vizituar ato personalisht për të rekrutuar të dënuarit, si mercenarë për të luftuar në Ukrainë. Prigozhinin shpesh e lidhin me Grupin Wagner, një organizatë e errët paramilitare mercenarësh, si dhe me kompani hotelerie.
“Unë besoj se ka pasur disa vizita nëpër burgje sepse rëfimet e para, se Prigozhin ka shkuar personalisht në një burg, na kanë ardhur dy javë më parë. Ne ishim skeptikë. Por, më pas filluan të vinin raporte nga Rjazani, nga Tula, nga Novgrodi, dhe ishte e qartë se ishte ai, sepse po dëgjonim edhe nga të burgosur që i njohim prej kohësh. Ne e dimë se ata janë të mirëinformuar dhe nuk kemi dyshime për dëshmitë e tyre. Po vërtetë bëhet fjalë për Yevgeny Prigozhin”, tha ajo.
