“Ka një të keqe të madhe me dy fytyra: Njëra në qeveri, tjetra në opozitë”

NGA Arlind Qorri
Fatkeqësisht, Organizata Politike nuk ka aq shumë aktivistë sa ç’rrethojnë me të kuqe duart amatore në videon e dëbimit të Bashës.
Do të donim, por ja që nuk ia kemi arritur ende, që aktivistë tanë të ishin edhe disa banorë të Zharrëzës që e pritën Bashën me fishkëllima e grushtin lart, edhe sa e sa qytetarë të tjerë të cilëve nuk u pushonte goja së thirruri: “Ik, ik!” Zotohemi, gjithsesi, që në ditët në vijim të flasim me të gjithë ata të cilëve nuk ua ka sjellë në majë të hundës vetëm një qeveri hajdute, por një sistem i tërë shoqëror dhe politik i mbështetur te hajdutëria, për të krijuar një platformë të gjerë qytetare antisistemore që mbështetet fort në parimet e të mirës publike. Hajduti i sotëm kërkon të ketë përballë hajdutin e djeshëm. Kështu, të dyja palët mund të vazhdojnë të luajnë hidh e prit me pretendimin e të keqes më të vogël. Nuk ka të keqe më të vogël. Ka një të keqe të madhe me dy fytyra: njëra në qeveri, tjetra në opozitë. Kush nuk ka për të mbajtur a fituar ndonjë privilegj prej këtyre katallanëve, duhet të bashkohet në përpjekjen e gjatë e të mundimshme për drejtësi shoqërore.