Qeveria shqiptare do të duhet të kishte publikuar këto ditë përgjigjen për kompaninë “Gjoka Konstruksion”, e cila ka bërë një ofertë për ndërtimin e rrugës së Arbrit.
Kompania propozon ndërtimin në formën e projektit “One billion” që ka prezantuar qeveria. “Gjoka Konstruksion do të paguhet nga buxheti i shtetit për 10-15 vite për të kompensuar vlerën e investimit të saj. Ajo ka propozuar që të bëjë përfundimin e rrugës për 190 milionë euro ose 203 milion dollarë”, shkruan revista Monitor.
Por kjo ofertë është afërsisht e njëjtë me atë të kompanisë kineze “China State Construction” të cilës qeveria shqiptare i ktheu përgjigje negative vitin e kaluar, në të cilën sqaronte se nuk ishte dakord me ofertën.
Kinezët kërkonin 215 milionë euro për ndërtimin e rrugës, që përfshin dy ura dhe një tunel.
Të njëjtin projekt thuhet se ka paraqitur edhe kompania shqiptare.
“China State Construction” kishte bërë 4 studime për rrugën. Megjithëatë në fund u refuzua. Nga opozita, ish –kryeministri Berisha ka akuzuar kryeministrin Rama për korrupsion. Në një publikimet e tij në facebook Berisha shkruante se kinezët u larguan pasi nuk pranuan rryshfetin që u kishte kërkuar Rama.
Qeveria shqiptare nuk e ka bërë asnjëherë transparencën e ofertës së kinezëve dhe arsyet e refuzimit të projektit.
Mungesa e transprarencës i shton dyshimet mbi arsyen e refuzimit të kompanisë së fuqishme “China State Construction” që kishte gjetur edhe financimin vetë në bankën kineze “Exim”.
Nëse qeveria do të pranojë të njëjtin projekt me të njëjtën shumë, dyshimet thellohen më tej, aq më tepër kur edhe për rastin e ofertës së kompanisë shqiptare transparenca mungon tërësisht.
