Dy lojtarë “rugby”, Ali Williams nga Zelanda e Re dhe James O’Connor nga Australia, kanë rënë në prangat e policisë franceze, gjatë një operacioni antidrogë, raporton BBC.
Mësohet se dy sportistët janë kapur në flagrancë këtë të shtunë duke blerë kokainë në afërsi të shëtitores Champ Elysees. Williams, 35 vjeç, luan për ekipin “Racing 92”, ndërsa O’Connor për “Toulon”.
Sportistët janë kampionë në Francë dhe bashkë me ta në pranga kanë rënë edhe dy shpërndarës. Në një reagim për shtyp, “Racing 92” ka deklaruar se ka pezulluar përkohësisht Williams.
“Nëse hetimi konfirmon zotërimin e kokainës dhe blerjen e saj, atëherë kjo jo vetëm do të ishte kundër ligjit por edhe një shkelje serioze e etikës sonë”, tha klubi në një deklaratë shtypi.
Williams ka fituar 77 ndeshje me kombëtaren e Zelandës së Re në vitet 2002-2012, kurse O’Connor ka luajtur në 44 ndeshje të përfaqësueses australiane në vitet 2008-2013.
