Prindërit e rep-artistit të famshëm Ledri Vula, Xheraldina dhe Agron Vula, kanë qenë të ftuar në “Pardon my French”, nga Jonida Aliçkolli dhe Elona Duro në Top Albania Radio. Ata kanë folur për punën, por edhe për familjen. Fillimisht çifti kanë treguar se Ledri e Sara kanë kaluar në plan të dytë pas lindjes së Poem.
“Ledri është pak introvert. Nuk del nga shtëpia pa i përqafuar dhe përshëndetur të gjithë. Është shumë i dashur, është shumë empatik, e ka qejf botën e vetë, kohën e vetë. Sara po ia kupton botën shumë mirë. Kohën e vetë e sakrifikon për Poin. Thotë mos më festoni ditëlindjen, mos më bëni surpriza, por kur ia bëjmë, i shijon shumë.”- ka thënë Xheraldina e më pas Agroni ka shtuar: “Flasim si babë e djalë. Bisedat kryesore i bën me Xheraldinën. Por ka gjëra edhe mes burrave… Sara dhe Ledri jetojnë me ne. Ata do ikin. Edhe ne kemi dëshirë që ata të ikin. Të jenë vetë, t’i çelin rrugën e vetvetes.”
Xheraldina ka treguar për marrëdhënien e saj me Sarën, e nëse ka zënka mes tyre: “Dashuria për Sarën erdhi shumë natyrshëm, për shkak se Sara është shumë e ngrohtë. Ledri është i ngrohtë me njerëzit por nuk rri gjatë. Sara është shumë e shoqërueshme, shumë e ngrohtë me njerëzit. Ajo u fut me komplet atë ngrohtësinë, sytë jeshil, me atë buzëqeshjen. Nëna ime thotë këtë vajzë si ta kishe bërë ti.Nënat e reja janë më praktike dhe ashtu duhet të jesh. Fëmija nuk rritet po nuk u rrëzua… Sara është shumë e kujdeshme, por ndonjëherë për nënë time Poin duhet ta mbash për dore në çdo sekondë. Unë me Sarën s’kemi probleme lidhur me Poin, por nëna ime ka disa kundërshtime.”
