Me mijëra bimë kanabisi, me një vlerë prej 1 milion stërlinash, u gjetën nga policia britanike në një bunker nëntokësor bërthamor, të ndërtuar në vitet 1980.
BBC raporton se bunkeri ishte ndërtuar për të strehuar zyrtarë, qeveritarë dhe personalitete politike në rast të ndonjë sulmi bërthamor.
Padyshim zbulimi më i fundit i policisë britanike, në një bunker bërthamor të papërdorur, ku kultivohej kanabisi, “është më i madhi dhe më i sofistikuari”, sipas detektivëve britanikë.
Me mijëra rrënjë kanabisi janë zbuluar pas një informacioni të marrë në rrugë operative, nga detektivët, në një ish bunker bërthamor të ndërtuar në vitet 1980 në Wiltshire, në perëndim të Anglisë.
BBC shkruan se edhe pse nuk ishte më objekt i Ministrisë britanike të Mbrojtjes, interesant është fakti se dyert e bunkerit bërthamor ishin të padëmtuara dhe janë hapur me çelësat që policia u ka kapur të arrestuarve.
Nuk ka ende njoftim për nacionalitetin e personave të përfshirë në kultivimin e kanabisit, pasi të arrestuarit nuk kishin adresa fikse.
