Numërohen më shumë se 8.000 persona, numri i atyre që kanë shkarkuar aplikacionin që lehtëson marrjen e dokumenteve. Në dhjetë gjuhë të ndryshme, projekti lindi në Itali nga një 30-vjeçar shqiptar që 20 vjet më parë u përballë vetë me burokracinë.
Mediat italiane raportojnë se aplikacioni lindi nga përvoja personale e shqiptarit. Pasi 20 vite më parë Bashkim Sejdiu, krijuesi i aplikacionit “InfoStranieri”, ishte si ata.
Sejdiu mbërriti në Itali nga Shqipëria kur ishte ende fëmijë dhe e ka përjetuar vetë udhëtimin e gjatë e të vështirë të burokracisë italiane, për të marrë shtetësinë dhe të gjitha dokumentet e nevojshme për të jetuar një jetë të re diku tjetër.
Burokracia është një mur i padukshëm me të cilin të gjithë ata që aspirojnë të bëhen shtetas italianë herët a vonë duhet të përballen.
“Për t’u pajisur me dokumente, tregon Sejdiu, duhet të ballafaqohesh me një burokraci që për vetë italianët është e komplikuar, ndërsa për emigrantët është 10 herë më shumë”.
I gjithë dokumentacioni është në letër dhe mungon një udhëzim që ndihmon të huajt në marrjen e shtetësisë.
“Problemi fillon, – shpjegon krijuesi i aplikacionit, – kur fillon burokracia dhe kjo ndikon në integrim, sepse i huaji që vjen në Itali dhe ka të bëjë me burokraci të gjata, automatikisht ka tendencën të mbyllet në komunitetin tij duke parë tek Italia një distancim, një ftohje që bën që ai të mos integrohet”.
Raportohet se në fillim Bashkim Sejdiut i është dashur të merret me stereotipet dhe paragjykimet që i kanë sjellë shumë pengesa për zbatimin e projektit të tij.
“Në fillim, thotë Sejdiu, ishte e vështirë që të më kuptonin se çfarë doja të bëja unë, një emigrant shqiptar tridhjetë vjeç. Shumë prej tyre nuk e shihnin këtë projekt me sy të mirë, por më pas arrita t’u tregoj institucioneve potencialin e tij. Edhe për shkak se po bëj një punë që duhet ta bënin ata, po ofroj një hartë të të gjitha dokumenteve dhe po bëj që emigrantët të ndjehen më afër institucioneve”.
Me rastin e Digital Day në nëntor 2015, krijuesi shqiptari i “InfoStranieri” i paraqiti Kryeministrit të asaj kohe Matteo Renzit dhe ministres për Thjeshtëzimin dhe Administratën Publike, Marianna Madia, nevojën gjithnjë e më të madhe për të lehtësuar aksesin e emigrantëve në institucionet italiane.
“Pavarësisht se kjo qeveri po bën shumë për dixhitalizimin dhe modernizimin e administratës publike, ende ka trajtuar problemet që kanë të bëjnë me emigrantët”.
Në një kohë kur integrimi dhe përfshirja sociale janë në rrezik nga ndjenjë gjithnjë në rritje e mosbesimit dhe mbylljes, lehtësimi burokratik mund të përfaqësojë një hap të vogël në drejtimin e kundërt të kësaj. Për më tepër, përhapja në një kohë të shkurtër e aplikacionit të Sejdiut është një shenjë e qartë e nevojës konkrete dhe reale.
“Qëllimi – vazhdon krijuesi i InfoStranieri – është që të ketë një avantazh të dyfishtë: nga njëra anë të sigurojë një shërbim për emigrantët, por edhe për institucionet italiane që në këtë mënyrë janë më afër 5 milionë njerëzve me nacionalitete të ndryshme që duan të jetojnë në Itali. Kjo është për mua një qëllim moral, një ëndërr”.
Sejdiu ka vendosur përmirësimin e shërbimit duke shtuar dy gjuhë më shumë nga tetë ekzistuese dhe pasurimin e aplikacionit që gjithashtu ofron shërbime që ndihmojnë në jetën e përditshme të emigrantit, si të gjej një profesionist, një shoqatë, të dijë oraret dhe funksionet e zyrave të caktuara ose sportelet për gratë në nevojë.
