Policia e Sarandës ka proceduar penalisht administratorin dhe pronaren e një subjekti, që akuzohet se kishte zënë hapësirën publike me shezlongë dhe çadra, të vendosura pa lejen përkatëse në plazhin e Pemës së Thatë në Ksamil.
Po ashtu, policia ka vënë re se ata nuk lëshonin kupon tatimor për shërbimin e ofruar dhe për rrjedhojë janë sekuestrohen 489 çadra dhe shezlongë.
“Në kuadër të planit operacional për kontrollin e vijës bregdetare dhe lirimin e hapësirave bregdetare të zaptuara në mënyrë të kundërligjshme, nga subjekte të ndryshme që vendosin çadra dhe shezlongë, nga specialistët për Hetimin e Krimeve në Komisariatin e Policisë Sarandë u referuan materialet në Prokurori dhe nisi procedimi penal për shtetasit: Gj. I., 58 vjeçe (pronare e subjektit), për veprat penale “Pushtimi i tokës” dhe “Fshehja e të ardhurave”; K. I., 38 vjeç (administrator i subjektit), për veprën penale ““Pushtimi i tokës”. Shërbimet e Policisë Sarandë, në bashkëpunim me Policinë Bashkiake Sarandë, kanë liruar hapësirën publike, duke hequr 489 çadrat dhe shezlongët që ishin vendosur pa lejen përkatëse, në vendin e quajtur ‘Pema e Thatë'”, njofton policia.
