25-vjeçari Shkëlzen Xhenja, i arrestuar si person i dyshuar për plagosjen me armë të shitëseje të shtunën e kaluar, doli sot para gjykatës së Shkodrës për t’u njohur me masën e sigurisë “arrest me burg”.
Në gjyq Xhenja nuk e ka pranuar autorësinë e krimit dhe ka deklaruar se nuk ka lidhje fare me ngjarjen.
Flutura Muça, 49 vjeçe, mbeti e plagosur me armë zjarri rreth ores 12.30 të së shtunës në lagjen “Fahri Ramadani”. Ajo ishte duke shitur në dyqanin e saj kur është qëlluar nga dy persona të cilët lëviznin me motorçikletë.
Kujtojmë se Muça është motra e Suela Sulës, gruas së vrarë në muajin prill të 2016-es nga bashkëshorti i saj Sadetin Sula në tualetin e mobilerisë së tyre dhe një nga pistat e hetimit lidhet më këtë ngjarje.
Sipas gruas së plagosur atentati është hakmarrje e porositur ndaj saj nga Sadetin Sula, kunati që ndodhet në burg, pasi atë e ka akuzuar për vrasjen e motrës.
