Situata në malin e Çikës është relativisht e qetë, thotë Prefekti i Vlorës, Flamur Mamaj, pas ndërhyrjes që është bërë nga të gjitha strukturat.
“Jemi në terren, po menaxhojmë situatën. Një vatër zjarri e cila është në disa gropa të Malit të Çikës, kemi angazhuar rreth 40 forca të armatosura dhe ka mbetur vetëm një vatër e shkëputur në një terren shumë të thepisur i cili është pamenxhueshëm me forca njerëzore”, tha Mamaj për A2 CNN.
“Jemi në kontakt me Agjencinë Kombëtare të Mbrojtjes Civile e cila na konfirmon që do të vijë një helikopter që do të bëjë të mundur eliminimin edhe të kësaj vatra. Është një zonë e izoluar dhe nuk përbën rrezik për Himarën, Dhërmiun dhe Borshin”.
