Shumë militantë të PD-së, shumë protestues, shumë njerëz pranë opozitës që i janë bashkuar thirrjes së Lulzim Bashës “ose zgjedhje të lira ose s’ka zgjedhje fare” kanë mbetur të habitur nga dyzimi i qëndrimeve mes kryetarit të partisë dhe ish liderit të saj.
Nëse Basha e ka përsëritur me dhjetra herë se në vend nuk mund të zhvillohen votime pa u zbatuar kushte, Berisha ka surprizuar dje në emisioni “Studio e hapur” e Eni Vasili, kur ka deklaruar se ai nuk është për mospjesmarrjen në zgjedhje.
Një deklarata e tillë e fortë, krejt në sens të kundërt me atë që thotë Basha duket se lë përshtypjen për Ramën se edhe nëse ai nuk i plotëson kushtet, PD-ja nuk do të bojkotojë. Motivet e kësaj deklarate të Berishës mbeten ende të pakuptueshme por ajo mund të shënohet si mospërputhja e tij e parë me të zgjedhurin prej tij që kur ka filluar protesta për zgjedhje të lira. (Lapsi.al)
