Prokuroria ka mbyllur hetimet për Fetah Marrën, 58-vjeçarin i cili në janar të këtij viti vrau fqinjën e tij Fatime Suli dhe më pas e hodhi në kanal.
Gruaja 64-vjeçare nuk ishte kthyer në banesë gjatë orëve të darkës si zakonisht. Kjo ka bërë që familjarët të jepnin alarmin duke lajmëruar policinë.
Forcat e rendit u vunë menjëherë në lëvizje, duke nisur kërkimet në zonë.
Gjatë orëve të vona, trupi i pajetë i gruas u gjet në një kanal gjysmë i zhveshur dhe i mbuluar me gjethe në lagjen “Havaleas”, vetëm 1 km larg banesës së saj.
Viktima ishte e zhveshur nga mesi e poshtë. Fillimisht u dyshua për një vdekje aksidentale, por Policia lokale nisi menjëherë hetimet, duke zbardhur edhe autorësinë e ngjarjes së rëndë.
