Nga Boldnews.al
Kompania “Bolv-Oil” është një prej operatorëve më të rëndësishëm në tregun e karburanteve në Shqipëri.
Në një raportim mediatik për vitin 2020, kompania renditej e dyta përsa u përket fitimeve.
Megjithatë, kur vjen çështja tek pagesat e gjobave të vendosura prej autoriteteve shtetërore, edhe “Bolv-Oil” e ka të vështirë t’i paguajë, duke u detyruar që t’i shlyejë vetëm me vendim gjykate.
Në 1 Korrik 2022, Gjykata Administrative e Tiranës ka pranuar kërkesën e Autoritetit të Konkurencës për lëshimin e urdhërit të ekzekutimit për gjobën 5 milionë lekë të vjetra ndaj kompanisë së hidrokarbureve.
Masa administrative është vënë në qershor të vitit 2018. Por, pasi kanë kaluar 4 vjet dhe “Bolv Oil” nuk e ka shlyer vullnetarisht gjobën, institucioni përgjegjës për Konkurencën është detyruar që ta ndjekë rrugën gjyqësisht.
Gjoba 5 milionë lekë
Në 25 Qershor 2018, Autoriteti i Konkurencës ka vendosur të gjobisë kompaninë “Bolv-Oil” sha me 500 mijë lekë të reja, pasi nuk ka informuar në kohë institucionin për të vlerësuar paraprakisht blerjen e një kompanie tjetër, me vlerë totale 74 milionë lekë të reja.
Në 30 Dhjetor 2016, “Bolv Oil” blen aksionet që kompania “Euro Trade Minerals Group” kishte tek shoqëria “Autovizion”, e cila nga ana e saj ishte dealer e automjeteve “Iveco” në Shqipëri.
Autoriteti i Konkurrencës, me nismën e tij, ka filluar procedurën e vlerësimit të përqendrimit lidhur me transaksionin e realizuar ndërmjet palëve.
Në përfundim, Konkurenca nuk ka gjetur problematika përsa i përket tregut, duke autorizuar vijimin e kontratës së shitjes.
Megjithatë, Autoriteti i Konkurencës ka vlerësuar të gjobisë “Bolv-Oil” me 5 milionë lekë të vjetra, për faktin se nuk ka kryer njoftimin e institucionit në kohë, siç e parashikon ligji.
4 vjet “refuzim”
Vlera e gjobës është minimale për një kompani që qarkullon miliarda lekë dhe me një fitim të konsiderueshëm.
Megjithatë, shoqëria e drejtuar nga Behar Çukaj ka refuzuar prej 4 vitesh që të shlyejë vullnetarisht detyrimin e vendosur prej Autoritetit të Konkurencës.
Në këto kushte, institucioni i drejtohet Gjykatës Administrative të Tiranës për të detyruar “Bolv-Oil” që të kryejë pagesën.
“Në përfundim të shqyrtimit të çështjes, gjykata vendos të pranojë kërkesën si të bazuar në ligj dhe të lëshojë urdhrin e ekzekutimit për Vendimin e Autoritetit të Konkurencës nr. 528, datë 25.06.2018, që i përket kreditorit Autoriteti i Konkurences, ndaj debitorit “BOLV OIL” sha, në shumën e detyrimit 500.000 (pesëqind mijë) lekë”, lexohet në vendimin e trupës gjykuese të drejtuar nga Gentian Hamiti.
Vendimi i gjykatës është i zbatueshëm menjëherë dhe tashmë, pas 4 vitesh, kompania “Bolv Oil” do të detyrohet të paguajë gjobën.
