Gjoni Muharremaj, i njohur si Gjon’s Tears, i ftuar në “A live night”, ka folur për jetën e tij profesionale, karrierën e po ashtu edhe për atë personale.
Këngëtari me origjinë nga Suhareka ka treguar se ishte bullizuar kur ka konkurruar te “Albania’s Got Talent”.
“Mbaj mend kur bëra ‘Albania’s Got Talent’ kam pasur njerëz që më shanin çdo ditë në Facebook. Mami e ka pas një Facebook edhe më thoshte mos e prek kurrë, se është puna ime se na shkruan ndonjë producent. Mbaj mend që e kam hap një herë, kishte aq shumë njerëz që më kishin shajt, që nuk e kuptova me të vërtetë pse, se unë nuk kam bërë asgjë të keqe, nuk kam shajt njeri, por do të ketë gjithmonë njerëz kështu, prandaj duhet të jesh i përgatitur”, u shpreh ai.
Gjoni jeton dhe vepron prej shumë vitesh në Zvicër, ku edhe ka bërë debutimin në tregun muzikor ndërkombëtar. Vitin e kaluar, Gjoni ka përfaqësuar Zvicrën në Eurovision dhe u rendit në vend të tretë.
