Çiklisti Daniel Oss pësoi një dëmtim të rëndë në qafë gjatë turneut të Francës, pasi u përplas me një nga tifozët që hynë në pjesën e pistës së destinuar për sportistët gjatë momentit kur këta të fundit po ngisnin biçikletat.
Mediat evropiane shkruajnë se çiklisti Italian u rrëzua në etapën e kalldrëmit, pas së cilës shkoi për të bërë skaner në spital ku u zbulua se kishte thyer një rruazë të qafës.
Siç shihet edhe në video, Oss ka lëvizur me shpejtësi në momentin që ka goditur fansin dhe e gjitha ka ndodhur pasi shumë prej tyre po tentonin të kapnin sa më mirë pozën teksa kalonte kolona e çiklistëve.
Tifozi me të cilën ai u përplas, ra në tokë nga përplasja, ndërsa një tjetër çiklist ra pas Oss. Bëhet fjalë për Michael Gogl, i cili ka thyer klavikulën dhe legenin.
“Ekzaminimet shtesë zbuluan një frakturë të vertebrës së qafës, e cila në vetvete kërkon imobilizim për javët e ardhshme. Për shkak të kësaj, Oss detyrohet të largohet nga Tour de France dhe i gjithë ekipi i uron shërim të shpejtë”, tha ekipi i tij.
