Bledi Kasmi, anëtar i Këshillit Kombëtar të PD, në një konferencë për mediat nga selia e kësaj partie, u shpreh se zjarret që kanë përfshirë masivin pyjor të Krastës janë të qëllimshme.
Kasmi tha se është e njëta dorë që qeveris kanabisin, inertet, guroret dhe gjithçka tjetër në mënyrë korruptivo-kriminale në Krujë.
“Partia Demokratike denoncon dorën e zgjatur të aferave korruptive shtetërore, që i vunë flakën pyjeve të Krujës.
Qëllimi është vetëm një: shfrytëzimi i masivit shkëmbor të zonës i pasur me gurë gëlqerorë, materiale që do të shkojnë në ndërtimet korruptive, koncesione korruptive dhe babëzinë e pafundme të Rilindjes.
Pavarësisht se kush janë dorasët, Partia Demokratike e dallon logjikën e porositësve.
Janë të njëjtët që e kanë kriminalizuar ekonominë e Krujës, qytetit me famë të shqiptarisë, kryeqytetit të arbërve të Gjergj Kastriotit.
Meqë jemi te Skënderbeu, atë që i ka bërë Edi Rama Krujës, nuk ia kanë bërë as hordhitë e sulltan Muratit.
I bëjmë thirrje organeve kompetente të punojnë për zbardhjen e ngjarjës dhe gjetjen, jo vetëm të autorëve, por edhe të porositësve.
Kur Kruja është në rrezik, Shqipëria është në rrezik!”, tha Kasmi.
