Bordi i krijuar me vendim qeverie për caktimin e çmimeve të karburanteve ka ulur lehtë tarifat e tregtimit të naftës, benzinës dhe gazit.
Lajmin e bëri me dije ministrja e Financave Delina Ibrahimaj, gjatë një konference për mediat këtë të Premte, kur dhe bëri një bilanc të treguesve ekonomikë.
Ibrahimaj tha se në mbledhjen e sotme, bordi vendosi sot të ulë çmimin e naftës me 6 lekë, benzinës me 7 lekë dhe gazit me 2 lekë.
Nga sot, çmimi i naftës në pompa do të jetë 243 lekë për litër, ndërsa çmimi i benzinës do të jetë 235 lekë.
Ndërkohë, çmimi i gazit do të jetë 81 lekë për litër.
Ministrja u pyet nga gazetarët lidhur me kritikat e shumta që kanë marrë vendimmarrjet e bordit, që kanë bërë që nafta në vend të shitet më shtrenjtë se shumicën dërrmuese të shteteve të tjera të botës.
Në përgjigjen e saj, ministrja mbrojti vendimmarrjet e bordit të karburanteve.
“Në asnjë rast vendimmarrja e bordit nuk ka qenë e ndryshme nga ecuria e bursës. Kemi bërë një analizë. Me siguri ju them se marzhet bruto të fitimit të kompanive, ku përfshihen dhe kostot operacionale të kompanive, këtë vit që nga moment i krijimit të bordit dhe deri më sot kanë qenë në nivelin 5 – 6% ndërsa vitin e kaluar ka qenë 15 – 18 %. Kjo e dhënë është e mjaftueshme për të kuptuar efektin që bordi ka pasur në nivelin e çmimit duke përmbajtur marzhin e fitimit neto apo bruto të të gjitha kompanive”, tha ajo.
