Mbreti Charles III ka mbërritur në Vatikan, duke u bërë monarku i parë britanik pas gati 500 vitesh që merr pjesë në një shërbesë fetare me Papën. Vizita dyditore e tij dhe e Mbretëreshës Camilla shënon një moment historik në marrëdhëniet ndërmjet Kishës Anglikane dhe asaj Katolike.
Sipas njoftimit të Pallatit Buckingham, çifti mbretëror do të marrë pjesë në një shërbesë ekumenike në Kapelën Sistine me Papën Leoni XIV, për të shënuar Vitin Jubilar 2025 të Kishës Katolike. Kjo është hera e parë që një monark britanik merr pjesë në një akt publik adhurimi me Papën, që nga ndarja e Kishës së Anglisë nga Roma në vitet 1530, gjatë Reformacionit të Henrikut VIII.
Në shenjë mirënjohjeje për përkushtimin e tij në promovimin e dialogut ndërfetar, Papa Leoni XIV do t’i akordojë Mbretit Charles titullin “Confrater Mbretëror” të Bazilikës Papale dhe Abacisë së Shën Palit Jashtë Mureve. Titulli, që vjen nga fjala latine frater (vëlla), simbolizon një vëllazëri shpirtërore midis Selisë së Shenjtë dhe Kurorës Britanike.
Në bazilikë është ndërtuar edhe një karrige e posaçme për Madhërinë e Tij, e cila do të mbetet përgjithmonë si simbol i respektit dhe bashkëpunimit ndërfetar.
Gjatë vizitës, Mbreti dhe Mbretëresha do të takohen për herë të parë me Papën Leoni XIV që nga zgjedhja e tij në maj. Ata pritet të zhvillojnë edhe takime me Kardinalin Pietro Parolin, Sekretarin e Shtetit të Vatikanit.
Mbretëresha Camilla do të vizitojë gjithashtu Kapelën Pauline, ku ndodhen dy nga afresket e fundit të Michelangelo-s që paraqesin Shën Pjetrin dhe Shën Palin.
Shërbesa në Kapelën Sistine do të ketë si temë “Kujdesi për Krijimin”, një kauzë e përbashkët për Mbretin dhe Papën, të njohur për angazhimin e tyre në mbrojtjen e mjedisit dhe natyrës.
Sipas Pallatit Buckingham, kjo është vizita e parë shtetërore që nga Reformacioni ku një Papë dhe një monark britanik do të luten së bashku – një ngjarje që konsiderohet si një hap i madh drejt afrimimit të marrëdhënieve ndërfetare mes Vatikanit dhe Mbretërisë së Bashkuar.
