Tre adoleshentë janë plagosur me thikë ditën e sotme pranë gjimnazit “Ibrahim Rugova” në Kamëz. Dy prej tyre, me inicialet A.L. dhe B.T., janë dërguar me urgjencë në spitalin e Traumës në Tiranë, pasi kanë marrë dëmtime serioze në kraharor. Një tjetër bashkëmoshatare ka pësuar vetëm lëndime të lehta.
Sherri fillimisht ka nisur brenda oborrit të shkollës dhe më pas ka përfunduar jashtë, ku nxënëset janë përplasur me thika. Në konflikt kanë qenë të përfshirë rreth pesë nxënës.
Aktualisht, dy 16-vjeçarët e plagosur ndodhen në sallën e urgjencës dhe po ekzaminohen nga mjekët.
Fatmirësisht nga ngjarja e sotme nuk ka viktima, por fenomeni mbetet shqetësues. Ky rast është pjesë e një serie ngjarjesh të dhunës mes të rinjve që kanë tronditur vendin. Vetëm disa muaj më parë, më 14 gusht 2025, 14-vjeçari Erald Xhejo u vra në fshatin Pirg të Maliqit nga bashkëmoshatari i tij Enedio Guri.
Në vitin 2024, 14-vjeçari Martin Cani, i cili u vra nga një bashkëmoshatar pas një konflikti të nisur në rrjetet sociale. Po atë vit, ngjarje të rënda ndodhën edhe në Shkozë dhe Gramsh, ku adoleshentë përdorën thika dhe sende të forta për të sulmuar bashkëmoshatarët e tyre.
Në Shkozë, 18-vjeçari Aurelio Dervishi humbi jetën pas një përplasjeje për një vajzë, ndërsa në Gramsh, 15-vjeçari Fatjon Bici u vra gjatë një konflikti mes dy grupeve të rinjsh.
Këto ngjarje tregojnë një fenomen shqetësues të dhunës mes të rinjve në Shqipëri. Pas vrasjes së Martin Canit, qeveria ia faturoi fajin platformës TikTok dhe kryeministri Edi Rama urdhëroi mbylljen e rrjetit social në Shqipëri. Pra në vend që të investojë vazhdimisht në mbrojtjen dhe edukimin e të rinjve, duket se shpesh preferohet spektakli politik
- Njoftimi i policisë:
Rreth orës 10:50, te bulevardi “Nënë Tereza”, në rrugë, dyshohet se janë konfliktuar për motive të dobëta, disa shtetas të mitur, të moshave 15-17 vjeç.
Gjatë konfliktit janë dëmtuar, dyshohet me mjet të mprehtë, dy 16-vjeçarë, të cilët ndodhen në spital, nën kujdesin e mjekëve. Është dëmtuar lehtë dhe një bashkëmoshatar i tyre, i cili është jashtë rrezikut për jetën.
Shërbimet e Policisë kanë shoqëruar disa shtetas dhe po marrin deklaratat e tyre.
