Ministri i Jashtëm i Rusisë, Sergei Lavrov, deklaroi sot, të martën më 30 shtator, se “rezultati i zgjedhjeve parlamentare që u mbajtën të dielën në Moldavi është manipuluar hapur”, duke ngritur akuza për parregullsi, pa ofruar detaje të mëtejshme.
Deklarata e Lavrov vjen pas fitores së thellë të partisë në pushtet pro-evropiane në Moldavi, e cila mposhti bindshëm bllokun opozitar pro-rus në zgjedhjet e konsideruara vendimtare për të ardhmen gjeopolitike të vendit.
Fitorja është përshkruar nga analistët si një sukses i madh për forcat që kërkojnë integrimin e Moldavisë në Bashkimin Evropian dhe shkëputjen nga ndikimi i Kremlinit.
Zgjedhjet janë parë si një moment kyç në betejën mes orientimit pro-evropian dhe lidhjeve historike me Rusinë, ndërsa autoritetet moldave i kanë përshkruar si të lira dhe demokratike, duke hedhur poshtë akuzat për manipulim.
