Inteligjenca Artificiale është shndërruar në fjalën kyçe të qeverisjes Rama 4, edhe pse premtimi fillestar i këtij mandati ishte integrimi europian.
Gjatë prezantimit të Albana Koçiut si ministre e Brendshme, Rama foli për futjen e AI edhe në administratën e rendit.
“Ministrja duhet të udhëheqë si gjithë ministrat e tjerë përshkallëzimin e revolucionit dixhital dhe futjen e inteligjencës artificiale edhe këtu në administratën e punëve të brendshme. Nuk e kam fjalën për të krijuar një ‘Diell’ polic këtu po për të futur AI në mënyrë që të rrisim parametrat e sigurisë në tërësi dhe këto parametra sic do e them në një copëz që kam shkëputur nga programi lidhen me punët e brendshëm.
Siguri më e lartë në rrugë, në shkolla, ku do vendosim në dispozicion të drejtorive një sistem regjistrimi në të gjithë ambjentin e shkollës, dhe nuk do ketë më histori sa thika ishin dhe kush i ra me shpullë i pari se kjo përshkallëzon te të rriturit. Siguri më e lartë për mbrojtjen e territorit me drone dhe pastaj siguria në qarkullimin e mallrave“, deklaroi Rama.
