Letonia pritet të bëhet shteti i radhës në NATO që do të zgjerojë shërbimin e detyrueshëm ushtarak edhe për gratë, në kuadër të forcimit të mbrojtjes përballë asaj që përshkruhet si kërcënim nga Rusia.
Ministri i Mbrojtjes, Andris Spruds, deklaroi se partia e tij, Progresistët, do të paraqesë vitin e ardhshëm një propozim për përfshirjen e grave në shërbimin ushtarak nga viti 2028. Ai shtoi se Forcat e Armatosura Kombëtare tashmë kanë nisur futjen e pajisjeve specifike për femra, për t’u përgatitur për ndryshimin.
Aktualisht, vetëm burrat kryejnë shërbim të detyrueshëm në Letoni, i cili u rikthye në vitin 2023 pasi ishte hequr që prej vitit 2006. Qeveria synon të dyfishojë madhësinë e ushtrisë nga rreth 15 mijë trupa në vitin 2021 në 31 mijë deri në vitin 2028.
Nëse miratohet, Letonia do të ndjekë shembullin e Danimarkës, e cila njoftoi në mars se do të fillojë rekrutimin e grave në vitin 2026. Kopenhageni e cilësoi këtë hap si një mënyrë për të siguruar “barazi gjinore” në forcat e armatosura dhe për të përmbushur angazhimet ndaj NATO-s.
