Tirana ka reaguar menjëherë pas shitjes së Emanuel Ernest në Algjeri, duke firmosur me Alfred Mensah. 26-vjeçari, që u nda vetëm dje nga Vllaznia, do të nisë menjëherë aventurën e re te skuadra e trajnerit Vangjel Mile.
Mensah nuk është i panjohur për futbollin shqiptar. Ai ka luajtur më parë me Skënderbeun dhe Partizanin, duke fituar titullin kampion me “Demat e Kuq” në vitin 2023. Në total numëron 144 ndeshje në Superiore me 25 gola, si dhe 19 paraqitje në Kupën e Shqipërisë ku ka realizuar 8 herë.
Shitja e Ernest për rreth 150 mijë euro shënon fundin e një cikli te Tirana. Përveç tij, këtë verë janë larguar edhe Jarmouni, Ndreca, Bajroviçi dhe Prenga. Pra, i gjithë sulmi i sezonit të kaluar është shpërbërë.
Statistikat e vitit të kaluar e bëjnë situatën edhe më të qartë: nga 44 golat e ekipit, 32 u shënuan nga lojtarët që sot nuk janë më pjesë e bardhebluve.
Çfarë ka mbetur
Aktualisht, në repartin e avancuar janë vetëm Abel Abah dhe Rimal Haxhiu. Të dhënat e tyre nuk premtojnë shumë: Abah 22 ndeshje pa gol, ndërsa Haxhiu vetëm 2 realizime në 30 paraqitje.
Me fillimin e sezonit të ri, Tirana duhet të rindërtojë plotësisht ofensivën. Mensah shihet si një hap i parë, por jo i fundit. Drejtuesit duhet të lëvizin sërish në merkato nëse duan ta kthejnë këtë periudhë të vështirë në një cikël të ri suksesi.
