Në Golem, banorët dhe pushuesit e zonës midis Malit të Robit dhe Qerretit, pranë Prestige Resort, kanë ngritur shqetësimin për ndotjen e madhe që ka përfshirë zonën e pishave, e cila është shumë e frekuentuar për piknikë dhe plazh. Sipas tyre, mbeturinat e shumta të lëna nga pushuesit kanë shkaktuar një mjedis të ndotur, duke kontribuar në mbledhjen e grerëzave që po bëhen një rrezik për fëmijët dhe të rriturit.
Një nga shqetësimet kryesore është papërgjegjshmëria e pushuesve që, pas përdorimit të hapësirës publike, nuk i mbledhin mbeturinat dhe i lënë ato në natyrë, duke e ndotur zonën. Pavarësisht kësaj, autoritetet lokale dhe vendore nuk kanë ndërmarrë masa të mjaftueshme për të pastruar zonën dhe për të parandaluar ndotjen e vazhdueshme, duke krijuar kështu kushte të dëmshme për shëndetin e banorëve.
Përmes këtij denoncimi, banorët kërkojnë ndërhyrjen urgjente bashkisë Kavajë me kryetar Fisnik Qosen, për të pastruar zonën dhe për të parandaluar një situatë të mundshme epidemiologjike për shkak të mbeturinave dhe grerëzave. Ata bëjnë thirrje për një veprim të shpejtë nga autoritetet përgjegjëse dhe për rritjen e ndërgjegjësimit të pushuesve për mbrojtjen e ambientit.
Denoncimi i mbërritur në redaksinë e JOQ Albania:
Përshëndetje! Doja te ngrija një shqetësim qe po hasim ne zonën midis Malit te Robit dhe Qerretit pranë Prestige Resort. Ne zonën e pishave e cila shfrytëzohet nga qytetaret/pushuesit ditor për piknik dhe plazh janë grumbulluar mbeturina dhe ndotje te shumta dhe si pasojë ambienti është mbushur me grerëza, te cilat po bëhen shqetësim për pickimin e fëmijëve. Problemi parë është papërgjegjshmëria e këtyre pushuesve që mbeturina që krijojnë nuk i mbledhin dhe ti hedhin në vendin e duhur. Problemi i dytë është papërgjegjshmëria e plotë e institucioneve lokale dhe vendore, të cilat nuk marrin masa për pastrimin e vendit nga ndotjet e shumta të cilat rrezikojnë dhe ndonjë epidemi të mundshme. Do ju isha shumë mirënjohëse n.q.s. do t’a postonit këtë shqetësim. Ju faleminderit!/ JOQ
