Një qytetare nga Saranda ka denoncuar në redaksinë e JOQ një rast të përsëritur të marrjes së parave në mënyrë të padrejtë në një plazh publik pranë portit të qytetit. Sipas saj, bashkia ka vendosur çadra falas për qytetarët, ndërsa dyshekët me ajër që ndodhen në ujë janë me pagesë. Megjithatë, dy persona, një grua dhe një burrë, po i shfrytëzojnë këto hapësira për të mbledhur para nga pushuesit edhe për përdorimin e çadrave, të cilat janë pa pagesë.
Denoncuesja tregon se gjatë një vizite me familjen, babait të saj i janë marrë 500 lekë nga një prej këtyre personave, me pretendimin se çadra ishte me pagesë. Pasi bashkëshorti i saj kërkoi sqarim, iu kthye përgjigjja se “gjej budallenj unë, pse mos t’i marr”. Sipas saj, kjo praktikë vazhdon çdo ditë dhe viktima kryesore janë turistët apo personat që nuk janë nga zona.
Qytetarja thekson se ky është një plazh publik dhe nuk ka asnjë arsye ligjore për të paguar për çadrat e vendosura nga bashkia. Ajo pretendon se i njëjti person i ka kërkuar para edhe disa ditë më vonë, pavarësisht se një javë më parë i kishte kërkuar falje pasi u përball me të. Në momentin kur ajo i kërkoi kupon tatimor, refuzoi t’i jepte dhe reagoi duke ngritur zërin.
Ajo shton se një ditë më parë ka qenë dëshmitare e një skene të turpshme, ku dy turistë të huaj e pyetën nëse plazhi ishte publik. Pasi morën përgjigje se po, refuzuan të paguanin për çadrën, dhe si pasojë personi që pretendonte pagesë ua hoqi atë. Sipas saj, ndonëse qeshi me turistët, situata ishte për të qarë, sepse tregon mjerimin dhe abuzimin që ndodh në vend, duke dëshmuar se ky fenomen është i përsëritur dhe i turpshëm.
Denoncuesja e konsideron këtë si “vjedhje të hapur” dhe shprehet e indinjuar që pushuesit, sidomos ata nga jashtë qytetit, shfrytëzohen në këtë mënyrë. Ajo kërkon që të merren masa, që situata të mos përsëritet dhe pushuesit të jenë të qartë se plazhi është publik e çadrat janë falas./ JOQ
View this post on Instagram
