Zjarri në fshatin Xath, njësia administrative Blerim, në Fushë Arrëz, vijon të përhapet me intensitet, duke marrë përmasa të konsiderueshme dhe duke rrezikuar zonat përreth.
Terreni malor dhe i thepisur ka penguar ndërhyrjen e mjeteve zjarrfikëse në zonë, ndërsa situata mbetet jashtë kontrollit. Për këtë arsye, është angazhuar një helikopter për ndërhyrje ajrore, i cili po punon për të izoluar vatrat aktive.
Ndërkohë, në pjesë të tjera të qarkut të Shkodrës, situata është më e qëndrueshme. Sipas raportimeve, në bashkinë Shkodër, vatrat e shfaqura një ditë më parë janë shuar dhe aktualisht nuk ka zjarre aktive në zonat pyjore.
Zjarri në Xath mbetet një nga më shqetësuesit në veri të vendit, ndërsa ndërhyrja nga ajri shihet si e vetmja mundësi për të frenuar përhapjen.
