Aida Cavo, Nëndrejtoresha e Përgjithshme e Shërbimit Social Shtetëror dhe nëna e personazhit të njohur publik Jonaid Myzyri, vijon të mbajë postin e saj drejtues edhe pse, sipas të dhënave zyrtare, ka mbushur moshën ligjore të pensionit prej afro pesë vitesh.
E lindur më 18 korrik 1960, Cavo nuk është tërhequr nga detyra, përkundrazi, është prezente në çdo mbledhje dhe vazhdon të ushtrojë autoritet të plotë brenda institucionit.
Burime nga brenda Shërbimit Social për JOQ, pohojnë se Cavo mban kontroll të drejtpërdrejtë mbi proceset vendimmarrëse dhe ka ndikim në shpërndarjen e fondeve të ndihmës sociale dhe pensioneve të invaliditetit. Akuza të përsëritura sugjerojnë se ajo ka “futur duart” në menaxhimin e parave publike dhe ka ndërhyrë në fatin e përfituesve më të varfër e më të pambrojtur të shoqërisë.
Përkundër ligjit që përcakton moshën e detyrueshme të daljes në pension, Cavo vazhdon të mbajë një rol aktiv, duke ngritur dyshime mbi mundësinë e mbrojtjes politike ose favorizimit për shkak të lidhjeve familjare me figura të njohura publike.
Derisa autoritetet të japin një reagim zyrtar, pyetja që ngrihet në opinion është e qartë: A është ligji i njëjtë për të gjithë, apo në Shqipëri ka ende “të paprekshëm” në administratë?/ JOQ
