Real Madridi ka siguruar të ardhmen e një prej talenteve më premtues të akademisë së tij. Klubi madrilen ka njoftuar zyrtarisht rinovimin e kontratës me Gonzalo Garcia-n deri më 30 qershor 2030, duke vendosur një klauzolë lirimi marramendëse prej 1 miliard eurosh, sipas raportimeve të “AS”.
Sulmuesi i ri spanjoll shpërtheu në skenën ndërkombëtare gjatë Botërorit të fundit për Klube, ku shënoi katër gola dhe dha një asist, duke tërhequr vëmendjen e publikut dhe medieve.
Garcia është një produkt i pastër i “cantera blanca”, pasi iu bashkua Real Madridit në vitin 2014, në moshën 10-vjeçare. Ai ka kaluar të gjitha nivelet e akademisë deri në ekipin e dytë, Castilla, ku ka luajtur dy sezonet e fundit.
Në deklaratën zyrtare, klubi theksoi:
“Real Madrid CF dhe Gonzalo García kanë rënë dakord për të zgjatur kontratën e lojtarit tonë, i cili do të qëndrojë me klubin për pesë sezonet e ardhshme, deri më 30 qershor 2030.”
Pas një vere ku u aktivizua në ndeshjet miqësore përkrah ‘yjeve’ si Mbappé dhe Vinicius Jr, Garcia pritet të marrë gjithnjë e më shumë hapësira edhe në ndeshjet e La Ligës dhe Champions League nën drejtimin e trajnerit Xabi Alonso.
Ky rinovim nuk është vetëm një investim për të ardhmen, por edhe një mesazh i qartë për klubet e tjera: Gonzalo Garcia është një pjesë kyçe e planeve afatgjata të Real Madridit.
