Janë zbardhur detaje të reja në lidhje me shpërthimin me lëndë plasëse që ndodhi më 24 korrik, në portën hyrëse të garazhit të biznesmenit Elvis Kosova, në rrugën “Peti”, pranë Liqenit të Thatë në Tiranë.
Autori i dyshuar, Klodian Steli, 36 vjeç, është identifikuar dhe shpallur në kërkim. Ai dyshohet se ka vendosur tritolin në derën e garazhit gjatë orëve të para të mëngjesit dhe më pas është larguar jashtë vendit. Automjeti që ka përdorur për të lëvizur natën e ngjarjes rezulton të ketë qenë në pronësi të tij dhe më pas është dhënë me qira për të humbur gjurmët.
Sipas burimeve hetimore, 36-vjeçari nuk ka pasur një konflikt të drejtpërdrejtë me Elvis Kosovën, ndërsa pista kryesore e hetimit mbetet ajo e porosisë nga persona të tjerë, me të cilët Kosova dyshohet se ka pasur një përplasje të mëparshme ku është përdorur edhe armë zjarri.
Ngjarja ndodhi rreth orës 03:50 të mëngjesit të 24 korrikut. Si pasojë e shpërthimit, u dëmtua qepeni i garazhit, fasada e disa njësive përreth si dhe katër automjete të parkuara pranë.
Tritoli në garazhin e Elvis Kosovës, shpallet në kërkim 36-vjeçari nga Fushë-Kruja
