Peter Itodo Mandela dhe Baton Zabërgja do t’i japin lamtumirën Dinamos gjatë kësaj vere. Klubi raportohet se ka pranuar ofertën e Metalist 1925 në Ukrainë dhe të dy futbollistë do të vazhdojnë atje karrierën e tyre.
Pritet që lamtumira të ndodhë pas ndeshjes së kthimit të Ligës së Konferencës kundër Atletik D’Eskaldes, kur Dinamo të jetë e sigurt për kalimin e turit në Europë.
Kështu, blutë do të përfitojnë ekonomikisht edhe nga paratë që sigurojnë nga UEFA, e sigurisht edhe nga shitja e futbollistëve, dhe shifrat që do të përfitojnë, janë rekord për klubin blu, ndër më të lartat e përfituara në futbollin shqiptar për transferime futbollistësh.
Mediat ukrainase bëjnë të ditur se për Mandelën, Dinamo do të përfitojë plot 1,1 milion euro, një shumë e lartë e cila kalohet vetëm nga ajo 1,4 milionë euro që Metz pagoi për Xhuliano Skukën për ta transferuar nga Partizani.
Ndërkohë, nuk është bërë e ditur ende se çfarë shumë është paguar për Zabërgjën, por edhe vlerësimi i tij është mbi 1 milion euro dhe pritet që në fakt të jetë ai i cili të vendosë rekordin e ri për transferimet nga kampionati shqiptar.
