Dinamo ka zgjedhur Elbasanin si “shtëpinë” e vet edhe për këtë sezon në Kategorinë Superiore dhe kjo u konfirmua zyrtarisht edhe nga FSHF gjatë caktimit të kalendarit për sezonin.
Blutë do të jenë pritës në “Elbasan Arena” gjatë sezonit, duke qenë jashtë kryeqytetit për pjesën më të madhe të ndeshjeve të tyre. Por duket se këtë gjë kanë zgjedhur ta bëjnë edhe me ndeshjet europiane, ku të paktën me rastin e kthimit pas 15 vitesh në Europë, mund t’ua bënin pak më të lehtë ndjekësve që të shihnin nga afër në veprim skuadrën e drejtuar nga Ilir Daja.
Blutë mposhtën Atletik Eskaldes në Andorra në ndeshjen e parë të turit të dytë të Ligës së Konferencës, ndërsa në javën e ardhshme do të presin në “Elbasan Arena” në orën 20:45 këtë skuadër për ndeshjen e kthimit.
Pritet që në eventualitetin e kalimit të turit, dinamovitët të vazhdojnë të luajnë ndeshjet e tyre në këtë impiant, edhe pse ekziston mundësia e përdorimit të stadiumit “Air Albania”, meqë Partizani doli nga gara europiane.
