Gjykata ka lëshuar një urdhër-arrest ndaj Atilla Kardesh, ish-konkurrent në Big Brother VIP Kosova 3, për shkak të mungesës së pajustifikuar në seancën gjyqësore të 23 korrikut, ku po gjykohet për një çështje me ish-bashkëshorten e tij, Drenusha Latifi.
Seanca u mbajt deri në orën 13:40, ndërsa avokati i Kardesh deklaroi në sallën e gjyqit se klienti i tij ishte detyruar të udhëtonte në Suedi për çështje që lidhen me nënshtetësinë. Ai shtoi se ishte njoftuar përmes telefonit tre ditë më parë, por nuk kishte marrë ende asnjë dokument për ta vërtetuar këtë udhëtim.
Ndërkohë, përfaqësuesja ligjore e Drenusha Latifit kundërshtoi këtë pretendim, duke theksuar se Kardesh është shtetas i Kosovës dhe Suedisë dhe nuk ka pasur asnjë arsye ligjore për të mos qenë i pranishëm në seancë.
Pas shqyrtimit të rrethanave, gjykata vendosi të shtyjë seancën për në 25 shtator 2025, ora 09:30, duke bërë të ditur se kjo datë zëvendëson ftesat standarde për të gjitha palët. Ndërkohë, urdhër-arresti ndaj Kardesh mbetet në fuqi.
