Një deklaratë e fortë dhe provokuese nga ministri izraelit i ekstremit të djathtë, Amihai Ben-Eliyahu, ka ngritur temperaturat e tensionit në Gaza dhe në të gjithë rajonin e Lindjes së Mesme.
“E gjithë Gaza do të jetë hebreje. Qeveria po shtyn përpara që Gaza të zhduket. Falë Zotit, po e zhdukim këtë të keqe. Po e shtyjmë popullsinë që është edukuar me Mein Kampf-in”, tha Ben-Eliyahu, duke u cituar nga gazetari i Axios, Barak Ravid, në rrjetin social X.
Deklarata e tij është konsideruar si një thirrje për spastrime territoriale dhe përshkallëzim të mëtejshëm të konfliktit me Hamasin, në një kohë kur përpjekjet ndërkombëtare për një armëpushim janë ende në tryezë.
Ndërkohë, zyra e kryeministrit izraelit Benjamin Netanyahu njoftoi tërheqjen e delegacionit izraelit nga negociatat në Doha, pas përgjigjes që Hamasi i ka dhënë propozimit të fundit për marrëveshje.
“Në dritën e përgjigjes së Hamasit ndaj propozimit, është vendosur të tërhiqet ekipi negociator nga Doha për konsultime të mëtejshme në Izrael”, thuhet në deklaratën zyrtare.
Pavarësisht kësaj tërheqjeje, Izraeli ka shprehur vlerësimin për përpjekjet e ndërmjetësve ndërkombëtarë. “Ne vlerësojmë përpjekjet e Katarit, Egjiptit dhe të dërguarit të Shtëpisë së Bardhë, Steve Witkoff, për të arritur përparim në negociata”, përfundon reagimi nga zyra e Netanyahut.
Situata në Gaza mbetet kritike, ndërsa deklaratat ekstremiste si ajo e ministrit Ben-Eliyahu rrezikojnë të minojnë çdo hap drejt paqes.
