Pas zhgënjimit në Champions League, Egnatia synon të rikthejë krenarinë e skuadrës në përballjen që do të zhvillohet mbrëmjen e nesërme ndaj Dinamo Minsk, kampionë të Bjellorusisë.
Trajneri i ekipit, Edlir Tetova, dha një lajm të pakëndshëm për tifozët, duke konfirmuar mungesën e dy futbollistëve kyç të skuadrës për këtë takim të rëndësishëm:
“Udhëtimi për në Hungari ka qenë i mirë, kemi ardhur që prej ditës së hënë dhe kemi punuar intensivisht në kushte optimale. Po fokusohemi edhe në aspektin psikologjik, dhe do të ishte ideale të kishim pasur më shumë kohë për përgatitje,” tha Tetova.
Ai shtoi se, megjithëse Lushkja rikthehet pas pezullimit për karton të kuq, skuadra do të jetë pa Ndrecën dhe Leo Melon, dy elementë të rëndësishëm të ekipit.
Përballë do të kenë një skuadër të fortë dhe të shpejtë, që vjen pas një ritmi të lartë në kampionatin e tyre kombëtar, por Tetova shprehet i bindur se skuadra do të japë maksimumin në fushë.
“Qëllimi ynë është kalimi në raundin tjetër dhe do të përpiqemi të bëjmë më të mirën në çdo minutë të ndeshjes, duke qëndruar të bashkuar si skuadër,” përfundoi trajneri i Egnatias.
