Një aksident i ka marrë jetën një turisteje holandeze në zonën e njohur turistike të “Gjirit të Filikut”, në Himarë.
U raportua se viktima është M. B., 23 vjeçe, e cila dyshohet se është rrëzuar aksidentalisht gjatë një zbritjeje me litar nga një shkëmb.
Sipas policisë, pas rënies, turistes iu dha ndihma nga shërbimet e Policisë Kufitare, por për shkak të plagëve të rënda, ajo nuk mundi të mbijetojë dhe ndërroi jetë gjatë transportimit për ndihmë të specializuar.
Në momentin e aksidentit, rrëshqitja e disa gurëve ka lënduar edhe një tjetër turiste, J. L., 18 vjeçe, me shtetësi franceze. E reja është dërguar në spital dhe ndodhet nën kujdesin e mjekëve, jashtë rrezikut për jetën.
Në vendin e ngjarjes ndodhet grupi hetimor, i cili po punon për zbardhjen e plotë të rrethanave të aksidentit.
Zonat e thepisura dhe të izoluara përgjatë bregdetit jugor, si “Gjiri i Filikut”, janë kthyer në destinacione të preferuara për turistët aventurierë, por mungesa e infrastrukturës së sigurisë dhe mbikëqyrjes profesionale vazhdon të mbetet një shqetësim serioz.
