Pas transferimit të Nico Paz verën e kaluar te Como dhe që rezultoi një sukses i vërtetë, Real Madrid dhe klubi i Serisë A do përsërisin të njëjtin skenar me një tjetër lojtar këtë verë.
Dy klubet kanë arritur marrëveshjen për transferimin e Jacobo Ramón, qendërmbrojtësi 20-vjeçar që ka shkëlqyer te Real Madrid Castilla dhe ka luajtur vetëm pak minuta me ekipin e parë.
Marrëveshja mes klubeve është mbyllur për 2.5 milionë euro. Real Madrid do të përfitojë 50% të shumës në rast të shitjes së lojtarit në të ardhmen si dhe për 3 sezonet në vijim, klubi madrilen ka të drejtën ta rikthejë për 7 milionë euro sezonin e ardhshëm, 8 dhe 9 milionë euro në dy sezonet pasardhëse.
Jacobo Ramón ka qenë një nga lojtarët më të spikatur në ekipin e dytë të Real Madridit, por kalimi i tij në ekipin e parë nuk ka qenë i mundur.
Edhe pse klubi ka vlerësuar potencialin e tij, Xabi Alonso nuk i jep dot minuta në ekipin e parë, ndaj është marrë vendimi për të lejuar largimin e tij drejt një ekipi në rritje siç është Como.
