Adolfo Macías Villamar, i njohur me nofkën “Fito”, një nga figurat më të rrezikshme të krimit të organizuar në Ekuador, është ekstraduar në Shtetet e Bashkuara. Koka e bandës së fuqishme “Los Choneros” do të përballet me drejtësinë amerikane për akuza që lidhen me trafikimin ndërkombëtar të drogës dhe armëve.
Ekstradimi i “Fito”-s vjen pas arrestimit të tij në qershor, gati një vit pas arratisjes nga një burg i sigurisë së lartë ku vuante një dënim me 34 vjet për vepra të rënda penale. Ai u kap nga autoritetet ekuadoriane në një bunker nëntokësor, të ndërtuar nën një shtëpi luksoze në qytetin bregdetar të Mantës.
“Fito” pritet të paraqitet të hënën në një gjykatë federale në Bruklin, ku do të deklarohet i pafajshëm për akuzat e ngritura ndaj tij, ka konfirmuar avokati i tij, Alexei Schacht, për agjencinë Reuters. Sipas Schacht, klienti i tij do të mbahet në një burg amerikan në pritje të zhvillimeve të mëtejshme të procesit gjyqësor.
Macías konsiderohet si figura kryesore që transformoi Ekuadorin nga një vend me potencial turistik në një nga shtetet më të dhunshme në rajon, për shkak të aktiviteteve të bandës së tij, e cila ka lidhje me kartelet meksikane dhe rrjete kriminale nga Ballkani. Ai dyshohet gjithashtu si urdhëruesi i vrasjes së kandidatit presidencial Fernando Villavicencio në vitin 2023.
Autoritetet ekuadoriane konfirmuan se Macías u nxor nga burgu “La Roca”, me siguri maksimale, të dielën dhe iu dorëzua zyrtarisht autoriteteve amerikane. Presidenti i vendit, Daniel Noboa, e përshëndeti operacionin, duke theksuar se kapja dhe ekstradimi i “Fito”-s është një hap i rëndësishëm në luftën kundër krimit të organizuar.
Ekuadori është kthyer në një nyje kyçe për trafikimin e drogës, ku mbi 70% e kokainës që prodhohet në botë kalon përmes porteve të tij, për shkak të pozicionit strategjik midis Kolumbisë dhe Perusë, dy eksportuesit më të mëdhenj të kokainës në botë.
