Janë 39 persona që kanë humbur jetën dhe mbi 100 të tjerë që janë plagosur nga zjarri izraelit pranë dy qendrave të shpërndarjes së ndihmave në Gaza.
Lajmi është bërë i ditur nga Mbrojtja Civile e Rripit të Gazës.
“Sulmet,” – tha një zëdhënës i saj – “kanë ndodhur pranë dy qendrave të shpërndarjes së ndihmave, njëra në jug të Khan Younis dhe tjetra në veri të Rafahut, të administruara nga Fondacioni Humanitar i Gazës (Gaza Humanitarian Foundation).”
Bilanci i mëparshëm, sipas të njëjtës burim, ishte 32 të vdekur dhe 100 të plagosur.
Nga ana e saj, organizata GHF ka deklaruar se lajmet për viktima pranë strukturave të saj janë “të rreme”.
E kontaktuar nga agjencia AFP, ushtria izraelite është shprehur se kishte identifikuar “persona të dyshimtë” në zonën e Rafahut, të cilët i ishin afruar ushtarëve. Siç pretendohet nga ushtria, për shkak se ata nuk iu përgjigjën kërkesave për t’u larguar, ushtarët qëlluan me armë “si paralajmërim”.
Zyrtarët ushtarakë kanë pranuar se kanë marrë njoftime për viktima gjatë incidentit, që sipas tyre ka ndodhur natën, rreth një kilometër larg nga qendra e ndihmave, e cila në atë moment ishte e mbyllur.
“Jemi duke hetuar,” kanë deklaruar ata.
