Është shembur paraditen e sotme me eksploziv ndërtesa e fundit pa leje në zonën e Thethit, duke përmbyllur kështu aksionin për lirimin e hapësirave në një prej destinacioneve turistike më të njohura të veriut të vendit.
Prej disa orësh forcat Xhenio montuan kallëpet e eksplozivit ndërsa tashmë u bë i mundur edhe shpërthimi i komanduar.
Banorët e kanë kundërshtuar me forcë këtë veprim, duke thënë se atyre iu ishte premtuar në vite që të zhvillonin biznese në pronat e tyre, por duke qenë se nuk kanë dokumentet, e kanë pasur të pamundur të aplikojnë për leje.
Situata në terren u rëndua disa herë, madje deri në hedhjen e molotovit drejt fadromave, ndërsa policia u detyrua të mbronte me armë punonjësit e IKMT-së në mënyrë që të kryenin punën.
Në mbrojtje të banorëve të Thethit shkuan edhe deputetë të opozitës që u përplasën me policinë në fundjavë.
Thethi është një nga fshatrat turistikë më të vizituar në veri të vendit. Kalimi Theth-Valbonë është një prej shtigjeve më të frekuentuar nga alpinistët dhe të apasionuarve pas ecjeve ngjitjeve në mal.
