Jamal Musiala ka reaguar për herë të parë pas dëmtimit të rëndë që pësoi në ndeshjen mes Bayern Munich dhe PSG në Botërorin e Klubeve.
Përmes një video-mesazhi në rrjetet sociale, ai falënderoi tifozët dhe botën e futbollit për mbështetjen.
Mesfushori gjerman theksoi se nuk fajëson askënd për dëmtimin, duke e konsideruar një situatë që mund të ndodhë në futboll. Kritikat ndaj portierit Donnarumma ishin të shumta, por Musiala shmangu çdo përplasje. Ai konfirmoi se operacioni ka shkuar mirë dhe se tashmë fokusi është rikuperimi.
“Dua të falënderoj të gjithë për mbështetjen. Kjo do të thotë shumë për mua. Është mirë të shikoj botën e futbollit të bashkuar për këto çështje gjatë kësaj kohe. E vlerësoj shumë.
Operacioni shkoi shumë mirë dhe jam në gjendje të mirë. Doja gjithashtu të thoja se nuk fajësoj askënd për këtë. Situata të tilla ndodhin. Tani do ta përdor kohën për të rifituar forcën time. Mezi pres t’ju shoh përsëri”, tha Musiala.
Futbollisti i Bayern Munich do të qëndrojë jashtë fushave për katër deri në pesë muaj. Rikthimi i Musialës pritet në fazën e dytë të sezonit.
