Një fenomen i pazakontë për muajin korrik ka ndodhur në Slloveni, ku reshjet e borës kanë zbardhur majat më të larta malore të vendit.
Sipas Agjencisë Sllovene të Mjedisit, bora ka rënë në zonat që ndodhen mbi 2,200 metra mbi nivelin e detit, përfshirë edhe Kredaricën dhe Kaninin dy prej pikave më të larta malore dhe me rëndësi meteorologjike në vend.
Pamjet nga terreni tregojnë një shtresë të bardhë bore në këto zona, ndërsa temperaturat janë ulur ndjeshëm në lartësi.
Kredarica, e cila ndodhet në 2,514 metra lartësi, është gjithashtu stacioni më i lartë meteorologjik në Slloveni, dhe shpeshherë shërben si indikator për ndryshimet ekstreme të motit në Alpet Juliane.
Ky episod vjen në një kohë kur Evropa Jugore po përballet me temperatura të larta, duke e bërë edhe më të pazakontë këtë rënie të temperaturave dhe reshjet e borës në rajonin alpin të Sllovenisë.
